政情：屯門候任區議員 編定更𥄫實大媽

擺街站當值 盼逼管理公司執法

屯門市中心選區候任區議員黎駿穎提到，話屯門有二十八名民主派區議員，而佢哋計劃編更表，到時喺每日下午時分會有兩個區議員落去屯門公園，以擺設流動街站方式「當值」。佢透露，話曾經有街坊投訴公園嘅管理員疑似「打龍通」，未見有執法，所以希望透過議員身份，可以迫使管理公司加強執法。

唔單止編更表，黎駿穎仲話區議會開會後，亦會就屯門公園嘅大媽噪音問題提出動議，同樣都係希望管理公司加強執法。

元朗戰線 擬提方案冚17億天橋

而喺元朗區議會方面，民主派就提過要推翻元朗十七億元天價天橋，東頭選區候任區議員林廷衞就話會提出替代方案，希望係有廣泛民意諮詢嘅方案，例如覆蓋明渠，又或者係由專業學會提出造價較為便宜嘅方案咁話。