政情：周浩鼎發展局齊甩轆 開位推數據共享遭否決

喺審議有關開位申請期間，旅遊界議員姚思榮質疑三維空間數據係咪可向旅客提供最新資料，以及將來係咪會同大灣區進行三地交流，互通數據等。郭家麒就話官方系統慢，錯嘅機會極大，質疑相關成效，擔心錢使咗得個吉。葛珮帆就擔心權限問題，質疑當局無法要求涉及嘅營辦商提供數據，建議合約內容會訂明互通數據等。

忽然表決又冇響鐘 建制返唔切

由於多議員提問，會議仲加時十五分鐘添，期間胡志偉有提過話將兩個職位分開表決，但局方就唔同意，話兩個職位要一齊做先得，堅持要一齊表決。但點知傾到就嚟完，阿鼎就忽然話進行表決，但係又冇響鐘，由於當時建制派只有五人在場，而非建制就有七人，搞到個議案被否決咗！

點解建制派唔夠人？事關當時仲有《廢物處置（都市固體廢物收費）（修訂）條例草案》委員會開緊會，其中九個建制派議員撞咗會，而喺人事編制小組委員會要表決申請時，只得潘兆平、盧偉國、陳振英、黃定光同謝偉銓在場，前三者同屬草案委員會成員，而剩低撞咗會嗰六個議員唔知去咗邊？

問番姚思榮係咪去咗開另外個會？佢就話唔係，自己上咗去搞業界嘢，雖然收到發展局同事訊息，但就話趕唔切太遲啦！而容海恩都話有收到訊息，但真係遲得太緊要啦！至於黃定光就話民生啲嘢，泛民要反對到底都冇計o架喇！換言之，阿鼎同發展局似乎齊齊計錯時間甩晒轆，搞到個議案遭否決，局長黃偉綸點搞o架，咁失策！

下月再上會 阿鼎籲局方拉好票

問番阿鼎係咪首次做主席就甩轆？佢就解畫話其實有關項目下個月可以再上會，但政府要做好拉票工作，同埋希望局方就趁呢段時間，認真諗諗分開投票呢樣嘢，因為其實之前係有唔少先例分開表決，亦都要解釋好涉款三億元做三維地圖，將來係咪真正可以讓市民感到有用，而唔係白象咁話。