政情：輕薄「尿袋」做枱獎 麥家榮：救急兼慳位
宴席嘅枱獎禮物雖然人人有份，但又未必人人都覺得啱用，要做到送出嘅禮物唔會畀人束之高閣，就真係要花吓心思。願景基金會名譽主席麥家榮就針對現代人嘅生活方式，選擇以「尿袋」為枱獎禮物。不過，大家唔好誤會，所謂「尿袋」唔係指復康用品，而係智能手機必備嘅便攜充電器。
指太厚會破壞西裝線條
點解港人會對便攜充電器起一個不雅嘅稱呼？麥家榮話實在難以考究。然而每個智能手機嘅用家，都好怕遇上電量不足嘅窘境，若果出街無帶「尿袋」，就會渾身唔自在。而佢就認為便攜嘅充電器不宜過厚，否則就會破壞男士嘅西裝線條，或會佔據女士手袋嘅寶貴空間，所以佢送出嘅便攜充電器，必定又薄又輕。然而世事難兩全其美，細充電器嘅容量亦較小，但喺無電情況下，就算些微電量已解燃眉之急。而佢亦正物色，附有適用喺唔同系統插頭嘅下一代便攜充電器，為用家提供更多便利咁話。