政情：容海恩追擊毛孟靜 重提歧視孕婦言論

容海恩話已向平等機會委員會投訴毛孟靜，指佢涉嫌歧視懷孕婦女，而平機會已同意毛孟靜嘅言論有歧視懷孕女性之嫌，可能剝奪懷孕婦女享有平等機會參與議會事務嘅權利，並不恰當。

毛孟靜喺本月三日嘅保安事務委員會會議上，指競逐委員會副主席嘅容海恩下月將要分娩，就嚟要放產假，認為完全唔能夠接受，認為佢要撤回提名。容海恩當時反駁，立法會議員並無產假，佢只會用一個月時間休養，亦會盡快返回崗位，協助主席進行會議。

尹兆堅逾期加入委員會獲批

保安事務委員會有兩名候選人競逐副主席一職，而容海恩以二十二票對十二票擊敗民主黨涂謹申。換言之，建制派包攬咗委員會嘅正副主席。另外，對於民主黨議員尹兆堅申請逾期加入委員會，委員會亦已同意。