政情：請議助要求每周做54個鐘 梁詠詩解畫：只係最差情況
新一屆嘅區議員將會就任，唔少候任區議員都開始公開聘請議員助理，當中就有議員因喺招聘廣告上列明嘅工時過長捱轟，其中東區區議會筲箕灣選區候任區議員梁詠詩（Jenny），早前喺Facebook貼文招聘議員助理，列明一個禮拜返六日、每日工作九小時，一個禮拜工作時數就高達五十四個鐘，就畀勞工界政黨見到，即刻譴責話咁長工時，真係不可接受喇！
工黨現任主席郭永健分析話，即使當每天有一小時午飯時間，每周工時仍然係四十八小時！仲話大家好似仲未搞得明，明文寫清楚工時五十四小時，同寫工時四十四小時，然後工作時間彈性安排係好唔同。佢仲話對從政者要畀基本勞工待遇，咁嘅要求唔係好過分啩？
已請到人肯捱義氣幫手
Jenny事後就澄清，話佢當日政綱冇承諾職工盟或工黨所謂嘅工時，今次都係自己第一次出招聘，大意冇留意到呢樣嘢，但就話其實五十四個鐘係最差嘅情況，同埋都係預計呢兩個月忙啲先咁，遲吓上咗手，加上會請兼職，就唔使返咁長時間o架啦，而超時工作都會有一點五倍補水！佢又透露，其實已經請到人，對方都好好，會捱義氣幫手咁話。