政情：宣傳 教育 區選 闢謠 聶德權衰足每一瓣 遭議員圍插懶懶閒

多名議員喺會上指市民對《基本法》認識唔全面，以至喺理解一國兩制上出現偏差。金融服務界張華峰直言，多年嚟政府推廣《基本法》都只係用搞展覽等古老方法，反問政府仲有冇新嘅宣傳方式？議員何君堯就指政府推動憲法教育不力，仲提到現屆政府喺競選時話會喺教育方面多撥五十億元，問政府會否就憲法同《基本法》獨立成科？

被問具體措施即卸膊

聶德權就回應話政制局要識得善用網絡，而過去半年事件更凸顯社交媒體嘅重要性，仲話其實局方用咗二千一百萬元喺宣傳上添！至於教育方面，佢指基本法督導委員會透過唔同小組推廣《基本法》，但當被追問到喺教育上有乜嘢具體措施時，佢就話要等小組入面嘅專家再諗吓點樣再做好推廣喎。

另一位議員梁美芬就關注過去半年喺網上大量流傳嘅假新聞，仲舉例話呢幾個月嚟示威活動中已經死咗兩千五百人，仲要用到英文拍片講到似層層咁。聶德權回應話政府過去有針對住呢啲網上假消息已主動作出澄清，仲講到話會加強執法。

回應欠積極 再受追擊

亦有建制派議員提到今屆區選，話有選民喺領取選票時發現自己「被投票」，無故被剝奪投票權，更大鬧政府仲遲遲未落實電子投票好似石器時代咁落後喎。聶德權就重申局方會按區選經驗作出建議，特別喺領取選票過程上作改善，但就話其實歷屆選舉都有重複選票問題，更指今屆只有九十八宗，同二百幾萬投咗票嘅選民比只係小數目添！

不過，聶德權呢番說話就引嚟議員陳恒鑌嘅追擊，佢指摘局方回應唔夠積極，並反指呢啲個案一單都嫌多，仲會令人質疑選舉可信性，又繼續大鬧政府一直冇正面回應議員提出嘅建議，反問政府嘅態度係咪要繼續咁懶懶閒？聶德權就為自己畀咗議員懶懶閒嘅錯覺感到抱歉，仲講到話實情唔係咁喎，不過之後佢嘅發言都只係講番局方將會喺三方面努力。