中環出更：搭飛機撞正罷工 江碧蕙靠按摩打發時間

江碧蕙話之前好多時喺法國飛返香港做嘢，撞到罷工真係好慘，因為成件事冇譜o架！佢就試過坐火車去英國飛，最耐等咗四個鐘。不過，有次香港飛上海延遲成八個鐘，但朋友竟然話好快o架喇，有時要等十二個鐘o架，不過佢就大讚香港機場好多嘢可以做，最鍾意就係按吓摩，其次就做吓修甲整頭髮等，相比喺歐洲食嘢同購物，香港真係好幸福咁話。佢仲提到杜拜機場，慨嘆真係好正，係一個購物景點，有朋友試過因為購物差點錯過班機。

孫蔡吐媚：去敦煌遇沙塵暴

轉個頭見到仁濟副主席孫蔡吐媚同前主席蘇陳偉香。蘇太就話有次香港飛歐洲，就因為撞正旺季，因為機位唔夠，爆晒棚飛唔到，航空公司就補幾百蚊美金，等大家住一晚酒店隔日再飛，不過好彩嗰次係自由行，唔影響行程。至於孫太就試過飛敦煌，但因為沙塵暴要被迫停留北京，仲有就係舊年大阪打風，當地交通幾乎癱瘓，關西機場關閉，仁濟本身計劃嘅關西之旅都要取消，轉去台灣。

江碧蕙（右）話飛機航班延遲嘅話最鍾意按摩打發時間。左為其丈夫。（溫國佳攝）

孫蔡吐媚（左）同蘇陳偉香（右）曾因大阪打風而無法繼續行程。

沈墨寧：日本較準時安全啲

杭州旅港同鄉會常務副會長沈墨寧都話幾年前同兩三個同事去歐洲公務，返香港時撞正機場罷工，真係非常麻煩，話要兜路去其他地方搭，多用咗六、七個鐘，大家都受影響，不過就話自己去日本多，日本就相對準時、安全啲咁話。

卓妮