政情：何君堯自比抗日防衞官
因為言論惹火，立法會議員何君堯早前被英國母校取消名譽博士學位，繼而喺屯門擺街站時又遇襲，上月更連任區議員失敗，但可幸嘅係中國政法大學頒授一個名譽博士學位畀佢。遇到連番挫折，何君堯日前喺官媒節目中就形容自己係當年抗日防衞官。點解呢？
話傷疤係「愛的記號」
何君堯話自己就好似盧溝橋事變同日軍決一死戰嘅防衞官，佢話呢個士兵好孤單，企喺戰線最前端，但冇做逃兵，企硬，無論日軍用咩理由都唔可以闖入。何又話：「君堯只是做個不要逃跑的士兵，談不上甚麼偉大，我就是做我分內的事情！」
至於畀扮佢支持者嘅人行刺，何話當時都好驚訝，除咗可能連命仔都冇，仲擔心法治以後都冇法保障無辜嘅人。何話傷勢已經好番晒啦，但留低一條L形嘅傷疤，佢就話呢個代表咗「Love」，係「愛的記號」啊！