政情：招募增選委員 民協騎呢要求寫文再面試
新一屆區議員仲有十幾廿日就上任，大家都開始密鑼緊鼓準備。民協深水埗區議員就話將會就新一屆區議會嘅增選委員作出公開招募，呼籲對社區、對議會有興趣嘅街坊盡快報名。最搞笑嘅係，要做呢個增選委員都唔易(口架)，又要寫文又要面試。
包括民協兩名副主席楊彧同何啟明等深水埗區議員在內嘅民協深水埗團隊，尋日喺Facebook（Fb）貼文，用「議會是你們的，也是我們的，但歸根究底還是你們的」做招募口號，叫深水埗居民申請做增選委員，名額初步有六個，視乎申請人數可作加減，截止日期就係十二月三十日。
要寫300字文章
點樣先做到增選委員？佢哋話申請人唔單止好似往年咁要得到區議會通過，今年仲要以你對深水埗的期望寫篇三百字嘅文同埋要面試先得。
區議會轄下委員會嘅增選委員，並唔係屬於政黨嘅，只係政黨會招聘代表自己加入委員會嘅增選委員。以前啲政黨通常搵番本身有意參選嘅黨員加入做增選委員，今次公開招募咁特別嘅？唔通想招攬多啲新血？