政情：區選變天樣樣反轉 半億噴泉隨時玩完
今屆區議會選舉泛民大獲全勝，當中觀塘區亦都係泛民佔多數，而繼元朗區議員要求煞停涉款約十七億元嘅元朗連接西鐵朗屏站至教育路以南嘅高價行人天橋之後，灣仔區現任議員楊雪盈日前聯同候任區議員，都話要煞停涉款約一億三千萬元嘅摩頓臺活動中心工程，依家連已經動工嘅觀塘區音樂噴泉都可能保唔住喇，事關當區嘅區議員同候任區議員醞釀要停止有關工程。
被指係「小白象工程」、逾五千萬元嘅觀塘區音樂噴泉項目一直惹起極大爭議，直到舊年底先喺立法會財務委員會通過撥款。期間都有區議員就項目公眾諮詢中引用具偏差數據、隱瞞民調結果及繞過區議會諮詢等問題，到申訴專員公署作出投訴，但最終都獲得通過撥款，之後就招標展開工程。但喺新一屆區議會泛民議員佔多數嘅有利情況下，佢哋擬翻盤，要煞停音樂噴泉工程喎。
候任區議員要求睇盤數
觀塘區議員鄭景陽坦言依家處於個尷尬位，因為工程已經開始咗，亦已經剷起咗成塊草地，錢都使咗一筆，如果無啦啦抽起，又好似浪費公帑，但就話議會都好有共識要停咗個工程先，再大家一齊諗個方向，例如話修訂吓個工程，改造一啲大眾設施方便市民咁。
鄭景陽又話同啲候任議員開咗一次會，但暫時未有實質方案，話大家仲諗緊辦法，同埋佢哋要求觀塘民政事務處計條數出嚟，想知剩低幾多錢，睇咗條數先再計劃吓提乜嘢方案，但民政事務處未講幾時回覆，佢哋會再追。
摩頓臺工程亦出現暗湧
咁係咪真係要煞停音樂噴泉嘅工程？佢話好多市民都係傾向唔要呢個音樂噴泉，至於係煞停定改入面嘅方案，就要睇剩低幾多錢嘞！而另一觀塘區議員黃子健早前都話民主派喺議會入面有優勢，但都要溝通咗先，唔好畀人覺得「為反而反」咁話喎。
話時話，灣仔班候任區議員話要約見民政事務局，煞停摩頓臺社區中心工程，依家動緊工嘅音樂噴泉若果真係要停工嘅話，當中涉及工程合約等複雜問題，睇嚟局長劉江華都好頭痕，究竟佢會點拆招呢？