中環出更：派對盛裝似小型聯合國 董吳玲玲：梗係着中國風格
每個國家同民族都有自己特色嘅傳統服裝，好似中國有旗袍、日本有和服、印度有紗麗咁，唔少人去外國玩都鍾意試着當地嘅民族服裝。香港善德基金會（基金會）早前搞咗個「國賓之夜」慈善派對，出席嘅嘉賓都花咗好多心思打扮，好似一個小型聯合國咁。
基金會主席董吳玲玲當晚着咗一身紅色晚裝，上面有花同雀仔嘅圖案，帶中式元素但又唔係傳統旗袍。董太話係先睇中塊布，覺得好精緻，再搵相熟嘅師傅訂造。佢話「國賓之夜」係希望來賓着特別嘅民族服裝，佢就當然着番中國風格o架喇！佢仲話前一排好興宮廷劇，身邊無論後生定老都有追劇，搞到佢都睇埋一份，佢仲好欣賞劇入面妃子着嘅衫添！
唐卓敏夫婦變油王同大長今
全場最吸睛嘅莫過於香港收藏家協會會長唐卓敏同太太Erica，一開始仲以為中東油王同「大長今」嚟咗！唐卓敏呢件阿拉伯長袍係之前去杜拜旅行嗰陣買嘅，連埋頭巾全套過，佢仲學埋中東男人打扮，戴番副黑超，如果留埋鬚直頭成個中東人呀！不過，佢就嫌打理麻煩。至於太太Erica就着咗件韓國傳統服裝，係今年去韓國嗰陣買嘅，當地朋友知道佢要參加國賓之夜，專登推介呢一套畀佢，話係韓國人喜慶嗰陣着嘅，色彩繽紛啲。佢又話有個韓國大媽教佢要將手擺喺上衣入面，咁先有禮貌喎，所以佢全晚都將隻手擺得好正經。
徐珊雯：改旗袍裙襬似娃娃裙
轉頭見到基金會兩名副主席郭康平同王亞明，仲有香港鐘表業總會前副主席徐珊雯。見徐珊雯着嘅旗袍同平時嗰啲有啲唔同嘅？原來係無咗側邊嘅開衩！佢話專登改咗裙襬，令成條裙有娃娃裙嘅感覺，可以顯長腿喎，不過天氣咁凍真係要着番對絲襪保暖嘞！佢平時去旅行都鍾意買吓當地特色嘢o架，但就未必買衫喇，多數買吓啲配飾腰帶咁囉！
卓妮