政情：八網難逃：梁栢賢同太太去芬蘭 賀結婚33年
醫院管理局前行政總裁梁栢賢（PY）展開退休生活已經逾三個月，退休前已講明要同太太歎世界同去旅行，而呢個計劃早就已經展開。
去冰餐廳食飯
PY尋日喺社交網站上大放閃光彈，上載同太太去芬蘭一間好有特色嘅冰餐廳用膳相片，見到間餐廳由牆身到餐枱同餐椅都係白雪雪，相信全部都係用冰做成，所以見佢哋都着晒禦寒衣物，證明當地真係好凍喇！
PY仲講到，呢一餐係慶祝結婚三十三周年，難怪要揀間咁有特色餐廳喇，PY咁有心思真係羨煞旁人喇！唔知佢哋呢個冰雪之旅玩幾耐，會唔會過埋白色聖誕先捨得返嚟香港呢？