政情：示威議題一大堆 梁君彥為省時分五類
修訂《逃犯條例》所觸發嘅示威浪潮已經持續半年，當中有唔少事件值得留意，過去有唔少立法會議員希望喺議會上跟進，搞到議程上一共有十九項相關議案咁多，咁立法會咪有排講？立法會主席梁君彥就決定分五項合併辯論去處理，實行去慳時間，防止班議員講完又講。
上個立法年度一共有四項議案與示威有關，當時就決定分兩項合併辯論，但立法會提早休會，十月中復會後又有「拉布」，拖吓拖吓搞到依家都仲未處理，仲要加上今個立法年度再有十一名議員提出十五項同示威有關嘅議案獲得批准，夾埋咪有十九項咁多囉！
避免重複 合併辯論
為咗善用議會時間同避免重複，梁君彥諗出分五個範圍去合併辯論，分別為六月十二日立法會外示威、七二一事件、八三一事件、警方對待示威者及現場執行職務人士方式，同埋修例所引發社會衝突或騷亂嘅前因後果。唔知梁君彥呢個分類，可以慳到幾多時間呢？