政情：李傲然自掏腰包 畀助理買書進修
正所謂書中自有黃金屋，唔少人都會睇吓書擴闊視野，增進吓知識。適逢唔少候任區議員開始籌組班底，其中喺油尖旺區議會大角咀北選區嘅候任區議員李傲然，就講明會自掏腰包出錢畀助理買書，仲講明冇乜限制添！唔知最終班助理又會買啲乜呢？
購字典都有資助
李傲然認為依家香港人生活節奏太快同埋太忙，未必有時間坐低睇書同埋增值自己，而佢嚟緊租嘅辦公室，所屬嘅大廈有個空中花園，所以希望助理可以利用依個機會增值自己。雖然佢就話冇乜限制，仲話就算買本五百幾蚊嘅字典都會資助，但都有講過話希望唔好太貴。至於未來佢就計劃會請四個助理，全職、兼職同埋半職都有。
而喺九龍城區議會土瓜灣南選區勝出嘅「九龍角落」李軒朗，亦都成功喺區內搵到辦事處，但議助方面就暫時未有人選喇，打算請兼職同半職為主。佢又透露，希望可以將辦事處打造成社區落腳點，得閒可以搞吓電影放映會、吹水會等等。