中環出更：促進溝通 吳錦青同囝囝打機做運動
博愛醫院日前舉行成立百周年嘅慈善餐舞會，當然唔少得主席吳錦青（David），佢就特別提到嚟緊一月中會喺電視台搞慈善電競比賽，仲要一連五集，原來佢都好鍾意打機，希望藉此同依家嘅年輕人多啲交流，帶出正面訊息，甚至希望可以影響年輕一代，教導佢哋喺打機之餘，都要學識關心吓社會、關愛弱勢社群。
David話最近玩緊「食雞」，真係跟得上潮流嘞！原來佢係同啱啱成年嘅細仔一齊玩（口架），加上孫仔孫女都分別只有四歲同七歲，開始搶住嚟玩遊戲機，一家人一齊玩，玩耐咗同年輕人就會有共同話題，而社會都好需要橋樑去互相溝通咁話。佢仲話自己好鍾意滑雪同玩風帆，都係跟囝囝一齊玩（口架），接觸多啲新事物，多啲正能量個人自然開心快活。佢仲透露因為多啲接觸年輕人，所以囝囝同自己關係都非常好，囝囝依家去咗波士頓讀大學都每日保持聯繫，好樂於同佢分享生活點滴。
李柏成去世界各地做公益
副主席李柏成（Jim）就有另類嘅旅行，就係世界各地周圍去做公益喇，原來Jim連同唔少前官員一齊搞咗個公益基金，佢哋用自己獨有嘅經驗，分別去唔同國家交流，例如越南、柬埔寨同老撾等，感嘆唔少地方因為建設多咗，生意人多咗，卻冇人去搞慈善搞公益，幫助當地因為快速發展而受影響嘅人，好似起醫院同學校等設施，佢認為呢啲都係建設過程中必須要做嘅，咁睇嚟佢真係一名疑難排解員。
永遠顧問譚姜美珠、候任主席簡陳擷霞同總理李淑媛都在場，譚太話前排獨自一人去澳洲探孫仔孫女，仲係特登去睇孫仔鋼琴比賽攞獎嘅，點知有日起身，一唔小心扭親條腰，搞到要即刻啟程回港，仲要自己一個搭飛機返嚟，好彩航空公司服務好，幫手車出車入，又幫手推行李咁，如果唔係真係混亂喇，結果返到嚟睇咗輪醫生，仲要做水療 ，前前後後休息咗兩個月，真係無奈嘞！
卓妮