政情：素人李頌慈鄉郊勝出 想約鄧賀年食飯破冰
區議會選舉唔少政治素人當選，部分人更係喺傳統由建制派包攬嘅鄉郊選區中勝出，其中喺元朗錦田選區當選嘅李頌慈，就話選舉過後都有邀約元朗區議會當然議員、錦田鄉事委員會主席鄧賀年。雖然仲未約得成，但李就話會繼續嘗試，希望可以同鄧會面同食餐飯，揚言要同對方破冰。
忙籌備工作 嘆難搵辦事處
居於錦田嘅李頌慈話，佢當選反映居民想求變，近日候任區議員都忙於籌備工作，佢喺鄉郊地區都好難搵辦事處，仲透露部分業主因為佢係民主派而唔租。被問到如果同鄉事派破冰，會唔會尋求鄉事派幫忙去搵辦事處，李就話現階段都係打算靠自己搵喇。
喺元朗十八鄉東選區勝出嘅李俊威就比較好彩，事關佢所屬嘅選區有公屋，所以喺搵辦事處方面就相對容易解決。佢又話，過往啲居民有事都會搵村長而唔係搵區議員，部分鄉事派都做得唔錯，只係立場唔同，認為民生議題同鄉事唔應該對立喎。