政情：泛民推舉轉跑道疑鬼打鬼 涂謹申：十畫未有一撇
民主派喺區議會選舉取得逾三百席，唔只為明年立法會選舉取得俗稱「超級區議會」嘅區議會（第二）議席入場券，亦都主宰傳統功能界別區議會（第一）議席。而「超級區議員」之一、民主黨（白鴿黨）涂謹申（阿涂）近日就被推舉「轉跑道」，改為參選區議會（第一）議席。民主派一向各懷鬼胎，白鴿黨早前先因區會主席之位爭櫈仔，依家民主派推舉阿涂，話唔係為爭奪「超級議席」都冇人信喇。
區議會（第一）議席一向由區議員互選，民主派喺今次區選得多數議席，料區議會（第一）一席都係民主派囊中物。於元朗元龍選區當選嘅、前學聯常委張秀賢尋日就建議應由阿涂出戰，話阿涂早前主持有關修訂《逃犯條例》會議，反映咗資深議員嘅作用，認為區議會（第一）議席非阿涂莫屬。
民意授權 幾十萬變幾百
其實早前與張同被稱為「雙學」嘅前學民思潮黃之鋒都有此建議，不過阿涂就話自己冇睇法，仲話邊有咁快諗呢啲嘢，「十畫都未有一撇」，而對於「轉跑道」心情上都難以接受，皆因「超區」本身有幾十萬民意授權，依家變咗得幾百人，質疑係咪「降呢」。民主派過往喺立法會選舉都爭崩頭，依家仲多咗咁多政治素人，戰況有幾激烈真係要拭目以待喇。