政情：中英大鬥法 何君堯獲頒名譽博士
正所謂一道門關咗，另一道門就會打開。立法會議員何君堯早排發表「洋腸論」同「曱甴論」，有英國上議院議員就去信何嘅母校安格里亞魯斯金大學（Anglia Ruskin University，ARU）要求褫奪何嘅名譽博士學位，ARU終撤銷其名銜，而何最近又敗走區議會選舉，頓時變「雙失」。不過唔使怕，事關佢有祖國錫番，話說何剛獲中國政法大學頒授名譽博士學位，話要表彰佢喺法律界嘅卓越貢獻同成就喎。唔通係中英隔空大鬥法？
英國母校褫奪 官媒曾發熱評
內地官媒報道，指今年十月三十日，針對ARU褫奪本港建制派議員何君堯喺二○一一年獲頒授嘅榮譽博士學位，官媒當時就發表熱評，話「天下誰人不識君，褫奪名譽博士學位對何君堯就是一種榮譽。」點知轉過頭，中國政法大學就頒個名譽博士學位畀何喇。
資料顯示何一九八四年喺英國取得法律學位後一直於本港法律界工作，亦曾任香港律師會會長，佢喺法律界有幾大貢獻同成就，自然各人有各人睇法喇。