中環出更：內會九度開會未誕主席 波哥斥泛民拉布自私
立法會內務委員會尋日開第九次會，但仍未選出正、副主席，民主派繼續拉布玩嘢，期間又不斷提出規程問題，拖延會議進度。多名建制派議員對此都嬲到爆，其中議員麥美娟（Alice）、陸頌雄同陳健波（波哥）都按捺唔住出言炮轟泛民，波哥直斥泛民議員自私，陸仲嬲到起身走人添。
建制議員倡設死線
Alice尋日就話，希望會議可就議員提出無約束力動議劃一個截止日期，以免要無限期處理動議，如果唔係真係搞到下年都未選到正、副主席。其黨友陸頌雄都話，內會拖咁耐真係創先河，覺得用大部分時間處理規程問題係完全冇節制，講到最後陸仲起身走人，邊行邊鬧民主派「九唔搭八」。
波哥之後亦都「接力」，話內會開九次會都未選到主席真係世界紀錄，仲話好多市民都睇住，叫泛民議員唔好咁自私，直言再係咁，香港人真係畀佢哋玩死咁話，最後波哥仲大嗌︰「我忍你好耐喇」、「你唔好咁過分噃，求求你快啲選主席」。不過對泛民嚟講，真係你有你鬧，佢哋有佢哋拉布，內會幾時先至選到正、副主席，真係唔知喇。
卓妮