中環出更：細個可樂當水飲 莊莎娜為咗家姐極速減磅
作為成功職業女性，工作同時都要努力保持身材，隨時以最佳狀態示人。近日金紫荊女企業家協會舉行午宴，執行委員莊莎娜（Sarah）就話自己細個好鍾意食零食同飲可樂，仲誇張地話屋企係冇水o架，而佢就可樂當水飲咁話。竟然咁都可以保持苗條？佢就話係因為家姐結婚，所以就喺一個月內將所有零食同飲品戒晒，一口氣減咗十磅，認真厲害。
Sarah話自己好鍾意食零食，但都會選擇健康少少嘅，例如用健康油炸嘅薯片，亦會盡量做多啲運動，而食少啲煎炸嘢或少食多餐都係好方法。如果佢前一日食得好多，第二日就會盡量食少啲平衡番。佢仲話，自己細個算瘦，中學時因為鍾意食零食，成個人都腫脹，之後家姐結婚先至再減番。
出席午宴嘅仲有永遠榮譽會長丘璟珊、主席林淑怡、第一常務副主席章曼琪（Katherine）同副主席沈貝嘉（Anita）。Katherine認為，維持心境開朗係最好嘅減肥方法，人開心自然會減少身體毒素喎。佢仲話有次驗身，醫生話佢身體內好嘅膽固醇多咗，先知原來個人心境開朗，身體會將啲膽固醇變成好嘅膽固醇，所以開心最緊要。Katherine閒時都會打高爾夫球同健身，但因為太忙，所以冇得成日做運動，新一年願望就係多做運動咁話。
楊大偉食素19載 身體健康皮膚好
同場仲有社企Green Monday創辦人楊大偉（David）。David食素十九年，佢話動物本身有毒素，食太多會令膽固醇過高，對身體冇益，食素皮膚會好啲，人又Fit啲，認為係最好嘅保養。而佢平時就鍾意行山，佢話○三年搬返香港，逢周末有空就同太太行山，吸收新鮮空氣，仲話係香港最好活動添。
卓妮