中環出更：劉江華「㷫賀」出爐區議員 親筆信連姓都寫錯
區議會選舉塵埃落定，按照慣例，民政事務局局長劉江華逐一去信祝賀所有候任區議員，先前已有唔少民主派候任區議員喺Facebook話「我不接受你的致賀」，仲叫政府班子立即問責辭職，勢估唔到佢竟然甩轆寫錯候任區議員嘅姓氏，仲有議員將佢封信貼咗喺垃圾桶添！
黃大仙候任區議員鄭文杰收到劉江華嘅致賀信，信嘅上款竟然係「許先生」，擺明甩轆喇！致賀信嘅內容仲寫上「期望與您並肩攜手，共建和諧理想的社區」嘅例牌嘢，但劉江華就喺信中話想同「許先生」並肩攜手合作，搞到鄭文杰都嘲諷劉江華，「好清楚政府有幾期待同我合作啦」。
鄭文杰直斥局長階層都犯咁嘅錯，又叫劉江華唔好諗住賴落啲職員度、唔好諗住處分啲底層職員，因為劉江華講明係自己親筆簽名，就應該自己睇過文件之後再簽名，冇理由可以「卸膊」o架！
葉榮發文指將信貼咗喺垃圾桶
另外，東區候任區議員李予信收到嘅致賀信，就話劉江華嘅簽名太潦草，被笑係「劉12華」，而成功連任嘅沙田區議員葉榮就直接將致賀信貼喺垃圾桶，仲喺社交平台貼文話係「今季最新款式垃圾桶，歡迎大家拍打及餵食」，擺明係話劉江華係垃圾桶喇！
卓妮