政情：今日你上鏡：開會食餅乾 邵家臻：糖尿病唔餓得
立法會不時都馬拉松式長時間開會，財務委員會會議就係其中之一。上周五下晝財委會連續召開三小時會議，由下晝四時開會至晚上七時，審議本港四間公立醫院包括葵涌醫院，威爾斯親王醫院、北區醫院以及瑪嘉烈醫院嘅重建及擴建項目嘅撥款申請，期間社會福利界議員邵家臻（阿臻）就被發現開會時喺會議室嘅座位度食餅乾。
黃定光亦曾食話梅抗睡魔
其實過往都有議員被發現喺開會時食嘢，好似進出口界議員黃定光，就曾經開會食話梅，以力抗「睡魔」，議員黃國健亦曾自爆沖普洱茶提神。唔知阿臻係口痕為食，定要對抗睡魔呢？阿臻就話平時喺立法會會議廳開會就唔畀食嘢嘅，但喺其他會議室開會時，立法會管事都會為議員準備咖啡同茶，當日佢因為太肚餓喇，加上患有糖尿病唔餓得，所以就問管事拎咗塊餅喎。