中環出更：質問食衞局淚彈點清 謝偉銓等兩月收行貨信
呢排各個地區都爆發激烈衝突，催淚彈同燃燒彈橫飛，社會好關注催淚彈殘留化學物嘅清理工作同對市民健康的影響。立法會建築、測量、都市規劃及園境界議員謝偉銓早就去信食物及衞生局局長陳肇始，問食環署清潔工係咪識得點清理，之但係事隔整整成兩個月，局方先回信，佢仲批評局方回覆信內容空泛添！
謝偉銓日前喺Facebook貼文，話喺上周三嘅立法會大會有兩條口頭質詢涉及有關問題。其實佢早喺九月已去信食衞局局長就此表達關注，仲問咗幾條問題，包括食環署清潔工係咪識得清理催淚彈殘留化學物，以及有關承辦商有冇向員工提供足夠嘅清潔用品同防護裝備、有冇向清潔工人額外發放津貼，以及有關化學物對土壤、水質同樹木嘅影響等。
斥無正面回答 內容空泛
佢話足足等咗兩個月，局方日前先回信，佢批評答覆內容相當空泛，冇正面回應佢提出嘅多項提問，所以會繼續跟進有關議題。
咁又係嘅，睇番食衞局嘅回覆信，內容都係行貨。老實講，陳肇始喺立法會大會回應有關催淚煙係咪有二噁英時都答得含含糊糊，畀班議員鬧爆，但勢估唔到，寫封咁嘅行貨信都要兩個月啫，真係咁難答？效率低就真。
卓妮