中環出更：親親大自然好治愈 魏華星將挑戰越野賽
早前係世界慢阻肺病關注日，香港社會創投基金創辦人及行政總裁魏華星話香港確診患上全稱「慢性阻塞性肺病」嘅病人數以萬計，而世衞組織更預計到二○三○年，慢阻肺病將繼心臟病同癌症，成為全球第三大殺手疾病。雖然有病就要食藥，但當病人需要長期同病魔糾纏，精神方面難免受到困擾，因此單靠藥物治病，似乎並非良策。
魏華星話西方社會近年已興起「大自然處方」，醫生為病人診療唔一定係處方藥物，而係鼓勵病人接觸大自然，到郊野行山散步，舒展一下筋骨，不但對病情有幫助，就連情緒方面亦大有裨益。
香港社會創投基金就同非政府組織醫護同行合作，開展為期半年嘅社區計劃，幫助慢阻性肺病患者及其家人，透過生活工作坊及大自然體驗以紓緩病情，同時改善生活質素。其實魏華星亦經常親近大自然，自早前傷愈之後，就不時去麥理浩徑跑山操練，準備下個月挑戰一百六十八公里嘅越野賽事。
范寧：港7成地屬郊野 珍惜善用
當日香港社會創投基金創新及企業培育經理李端儀、家庭醫學專科醫生程德君、醫護行者中心經理鍾巧儀、醫護行者主席范寧醫生同食物及衞生基層醫療健康辦事處處長蔡宇思醫生都在場。范寧就指慢阻肺病嘅患者因呼吸道收窄而經常出現咳嗽、氣喘同呼吸困難，病情嚴重者肺功能衰弱，就連輕微走路都會氣促，大為削弱外出走動嘅意欲，為免健康狀況每況愈下，鼓勵病人接觸大自然有其必要。佢話香港高達七成嘅郊野面積，值得大家好好善用。
易琪籲放低手機 享受鳥語風聲
森林療法嚮導易琪就話好多人就算置身郊野，仍無法抽離城巿嘅生活方式，不時用手機「打卡」以及同外界訊息往來。佢認為享受大自然最好係放低部手機，雖然手機係可以下載紓緩情緒嘅應用程式，但始終唔及得大自然嘅鳥語風聲咁奏效。
卓妮