政情：林道明亂局下返港 大嘆社會撕裂
五個多月嘅示威浪潮，令唔少人對呢個原本熟悉嘅香港感到陌生，相信對一班長居海外，隔一排先返香港一次嘅人感受可能會更加明顯。新界鄉議局海外顧問委員會會長林道明今個月返咗香港，佢就大嘆見到近期嘅社會事件覺得好傷感喇！
體會港人生活不便
林道明早排擔任團長，同十幾名鄉議局海外顧問一齊返香港，佢就話今次係趁鄉議局換屆冇耐，所以組織訪港團同新一屆鄉議局成員見面同溝通，雖然訪港團幾年先搞一次，但並唔代表佢哋對香港唔熟悉，因為只要佢哋平時返香港時，撞啱鄉議局會議都可以參與。
今次返嚟香港，佢就大嘆見到社會好撕裂，同時感受到香港人生活多咗不便，直言任何人見到都一定覺得唔開心喇，所以今次返香港唔單止要顧吓海外原居民福祉，亦都唔能夠忽略目前嘅困局。