政情：蕭偉強鯨吞十個包好閒

蕭偉強喺Facebook上載咗幾張小店嘅相，仲貼文話竟然喺嗰度搵到差不多絕迹嘅兒時風味。佢話小店係有麵包工房，而早午都源源不絕有出爐麵包。佢話新鮮出爐即食嘅菠蘿、雞尾、鹹豬同墨西哥包，就係佢小時候嘅極品美食。

小店贈包畀長者 顯人情味

見到兒時美食，佢仲自爆曾經喺金門麵包店門前一口氣啃掉五個菠蘿同五個雞尾包。咁今次又食十個？佢話依家雖然心有餘力不足，但都喺街頭即時吞咗兩個，算係償咗心願咁話。佢又話小店經營不易，但老闆娘敬業樂業，仲同善心人合作免費贈包餅畀區內長者，顯出香港鄰里守望嘅固有情懷，小店好有人情味咁話。