政情:搭輕鐵都頂到腳 何俊賢呻高佬煩惱

漁農界立法會議員何俊賢(高佬賢)為議會中數一數二嘅高佬,身高逾一米九嘅佢,比港人平均身高仲要高出一截,尋日佢就喺Facebook分享高佬嘅煩惱,講嘅係搭車時頂腳囉。

惹網民共鳴

高佬賢尋日搭輕鐵,坐低時雙膝即刻頂住前座,隨即將佢嘅姿勢鎖實,似乎比佩戴安全帶仲穩陣。佢發現,輕鐵車廂有空間可以將座位裝後兩吋,質疑唔知係咪有技術問題而冇咁做,認為如果青少年長期面對呢個情況,長遠會影響發育。唔少網民對高佬賢嘅分享都加把口,好多人話佢腳太長,亦都吸引唔少「高人」留言嘆感同身受,證明香港都有唔少高人。

高佬賢又講到,搭巴士都有同樣情況,但唔會因為咁而減少乘搭公共交通工具,只會買私家車時多考慮呢個問題。咁搭長途機時點算?佢就話以前會揀緊急出口座位,但現時因為工作關係甚少搭長途機,自言長假期幾乎喺佢嘅字典中剔除喇。

第一手消息請下載on.cc東網iPhone/iPad/Android/Windows Phone Apps