政情：八網難逃：斥高官淨識睇電視 梁志祥帶頭清路障
各區都有示威者堵路行動，唔少道路都設有路障，阻礙晒啲交通。立法會議員梁志祥（祥哥）前日就鬧爆班高官淨係識得睇電視去了解社會情況，仲叫佢哋不如帶頭落區清路障。唔知係咪怕被質疑有口話人冇口話自己，祥哥尋日就先身體力行，喺天水圍清理路障，仲話半個鐘就搞掂添。
聯同逾70名義工行動
話說尋日朝早六點幾，祥哥就同埋漁農界立法會議員何俊賢等黨友，聯同七、八十名街坊義工喺天水圍新北江路口清理路障。祥哥喺社交網站話，佢哋唔使半個鐘就已經將幾噸嘅磚頭同石塊等雜物搬到去路邊，等路政署嘅專車嚟到將雜物運走。祥哥又話，清理路障期間冇遇到黑衣人，認為佢哋有七、八十人喺度，所以完全唔擔心安全問題。被問到晨早搬咁多雜物，有冇周身骨痛，祥哥就話冇。果然平時踢開波、做開運動有鍛煉係唔同啲。