政情：羅智光企硬拒剔走警隊加薪
立法會財務委員會將會審議由上立法年度已積壓嘅公務員薪酬調整撥款申請，呢項議程原本毫無爭議，但就因為暑假休會呢幾個月嚟，警民關係持續升溫，而令呢項議程面對被反對危機。多個政黨已要求公務員事務局局長羅智光將警員加薪剔除喺公務員加薪議程外，不過羅就選擇企硬，好似唔怕攬炒令其他公務員冇得加人工咁。
民主派一直要求將警務人員調薪嘅內容喺公務員薪酬調整項目中分拆開來處理，本月初多名議員已去信批評警隊處理社會運動手法備受爭議，仲話現階段將任何涉及警隊嘅撥款交畀立法會審批都唔恰當，只會引起社會更加不滿，認為政府將警務人員同公務員薪酬調整綑綁處理會對其他公務員唔公平。
話冇理由偏離既定機制處理
羅智光尋日去信立法會，指有關項目喺事務委員會上匯報時冇任何異議，原本七月初已提交財委會，只係因為會議取消而未能審議，重申一直以來公務員薪酬調整都係按唔同薪金級別應用到全體公務員，唔會因部門或職系而有唔同，所以冇理據要偏離既定機制將警員加薪分拆處理喎。