政情：財會加會24小時 陳振英預咗「罰坐」
立法會財務委員會主席陳健波（波哥）喺立法會復會冇耐，就已經預告財委會將要密密加會，經諮詢議員後，財委會秘書尋日發信通知議員，指波哥已作出指示，將會喺本月廿九日至明年二月廿八日加開九次、合共廿四小時會議，每次會議時間為二至四小時。作為財委會副主席嘅陳振英（Ronick）話，已經同波哥分咗工，佢主要主持上午加會嘅會議，波哥就會負責財委會原定下午召開嗰啲會議喎。
同陳健波分上下午主持
Ronick話，因為波哥逢周五下午都要主持財委會，所以佢就會負責主持上午召開嘅財委會，咁樣就可以方便大家調配時間，當然如果有特別情況，都可以再作調動。被問到點解唔好似之前立法會有關禁蒙面法嘅法案委員會咁，正、副主席每人主持兩小時，佢就話咁樣安排會令佢同波哥更難走開去處理其他公務，所以分上、下午會更好啲。
財委會密密加會，相比普通議員，正、副主席「罰坐」時間更長，但Ronick話做得副主席就梗係預咗。嚟緊財委會都有唔少具有爭議嘅議程，好快就有機會見真章，睇吓Ronick主持成點喇。