政情：資料研究組增兩名額 議員申請照單全收
立法會資訊服務部資料研究組其中一個職責，就係因應立法會議員嘅要求進行項目研究，協助議員就特定政策或議題進行審議及討論。資訊服務部尋日就發電郵通知議員，話資料研究組嘅新研究計劃下，原本打算進行廿五項研究工作，但至截止日期，佢哋一共收到廿七項申請，所以資料研究組就決定新增兩個研究工作名額。唔通資料研究組怕順得哥情失嫂意，所以將議員嘅申請統統照單全收？
七議員首次申請
根據有關立法會文件，喺過往計劃推行下未獲編配任何研究名額嘅議員都可以獲得優先編配研究工作名額，而今次就有七名議員係首次申請，包括陳凱欣、陳恒鑌、劉國勳、柯創盛、許智峯、麥美娟同郭偉強。其中陳凱欣要求研究嘅課題係有關鄰近地方嘅地下空間發展及規劃，陳恒鑌就要求研究日本、新加坡、香港嘅國民教育。
由於編配研究工作名額嘅先後次序係透過抽籤方式決定，而經立法會秘書處抽籤後，議員陳克勤提出嘅有關新加坡、日本、英國退休人士福利和生活支援嘅研究就排到最後、即明年六月先處理。陳睇怕都有排等喇。