政情：徐德義彈弓手 抽起理大擴建工程議員鬧爆
香港理工大學位於何文田嘅斜坡校園擴建工程，將興建一座教學大樓予眼科視光學院和康復治療科學系，滿足本港專職醫療服務的需求，預計涉款逾十四億元，而早前已通過立法會相關事務委員會及工務小組討論，並提交至財務委員會審議。點知食物及衞生局副局長徐德義，尋日喺財委會會議上突然彈弓手，決定臨時抽起呢個項目，話因為唔同人士對項目有意見，當局希望有更多時間諮詢喎，結果被議員批政治凌駕民生、教育，係咪想罰年輕人，又被質疑係畀公僕加薪項目打尖審議。
徐德義喺會議一開始突然話要暫時抽起有關項目，似乎就連理大校方都唔知道，此言一出，泛民議員就即刻鬧爆，話一定係建制派要挾政府，其中梁耀忠就話做法好罕有，一定要畀個合理理由出嚟，話無理由用強權做嘢，完全唔尊重議會，大鬧政府唔可以行政決定大晒。
被質疑畀公僕加薪項目打尖
議員郭家麒就質疑政府係咪有其他計謀，例如想將議程較後項目調前，想知道點解個項目本身冇咩爭議，嚟到財委會先話要抽起？而區諾軒都話貿然抽起項目，係咪想優先審議公務員加薪，邵家臻就反問政府係咪想放棄年輕人，放棄大學。
議員批評政治掛帥犧牲教育
漁農界議員何俊賢就反擊護航，話吐露港公路依家畀中大學生堵塞，話大學機制有問題，對今次撥款畀大學好有保留。勞工界議員何啟明都話如果條路通番，咪支持繼續討論囉！不過，本身係理大校董的工業界議員吳永嘉就對臨時抽起撥款感到好失望，仲話一間大學發展經過精心及長時間規劃，政府一旦收回就唔知道幾時會重新提上會，希望大家將政治放一邊，以高等教育為依歸。
食衞局之後都有再重申，話絕對係臨時抽起，之後會盡快提交討論，點知泛民議員聽完仲更加嬲，繼續鬧建制派打壓大學、政府無能等，最後建制派議員幾乎走晒。泛民議員譚文豪就立即建議舉手投票，要求政府攞番個議程出嚟討論，主席陳健波見勢色唔對，即刻宣布提早結束會議。今次波哥又記一功，難怪建制派咁想佢接手做下屆立法會主席喇！