中環出更：泛民拉布拖垮內會 懶理建制打民生牌
立法會內務委員會破天荒開六次會議都仲未選出正、副主席，全因民主派發力拉布，加上現時會議由民主派議員主持，建制派可以話毫無反擊之力。面對咁嘅困局，建制派就大打民生牌，力數拖延內會正、副主席選舉，令內會無法正常開會，會對市民有咩影響。不過班民主派梗係唔受呢套，惟有下次再繼續討論選主席事宜喇。
話說尋日內委會繼續由民主派嘅法律界議員郭榮鏗暫時主持會議，佢話收到幾名民主派議員就內會選舉論壇處理模式提出嘅無約束力動議，內會之後就處理有關事宜，但過咗一個半小時都未討論完，可想而知班民主派拖得就拖。
空置稅法案亦未能審議
尋日會議大部分時間都係民主派議員發言，去到會議尾聲，有份爭取連任內會主席嘅建制派議員李慧琼（Starry）就忍唔住出聲批評郭嘅主持手法，質疑竟然用咗十幾個鐘都未能夠進入表決選舉辯論方案程序，目的只係阻止會議進入選主席環節。Starry話，內會進度緩慢對市民都有影響，包括市民所關注嘅空置稅法案，就因未能於內會成立法案委員會而未能審議，其他條例草案亦因議會無法正常運作而無法完成審議，對市民有實質影響。雖然講係咁講，但班民主派又點會聽得入耳吖。
卓妮