中環出更：交通燈損毀高危 羅少雄：幸港人互讓自律
最近本港唔少交通燈都受到破壞，令到好多司機非常頭痛。國際專業保險諮詢協會會長羅少雄都係駕駛人士，講起最近唔少道路交通燈無法運作時就話，佢每朝上班都途經交通燈受損嘅十字路口，次次都要打醒十二分精神，為免發生意外都要謹慎駕駛，行車時間都拖長咁話。
羅少雄話，佢駕駛私家車，可選擇抄內街小路，繞過交通燈遭破壞嘅主要幹道，不過巴士就未必有呢種彈性，依靠公共運輸嘅上班族就算提早出門，都難以掌握實際行車時間。佢自己公司都有同事遲到，不過大家都係喺困難重重之下上班，作為僱主都應多加體諒喎。羅又話，道路冇咗燈號指示，實在係好危險，幸好至今未釀成嚴重交通事故，不過呢啲都有賴道路使用者做到互讓，顯示港人喺非常時期仍然可以保持自律，係十分難得嘅高公民質素咁話。
徐英偉：兒子返學常被迫遲到
育有三名兒子嘅勞工及福利局副局長徐英偉（Caspar）就因為其住所附近嘅交通燈受到破壞，令兒子呢排經常都要遲十幾分鐘先至返到學校，而佢自己放假嘅話，就會盡量減少駕駛同外出。Caspar話破壞交通燈，普羅大眾都係受害者，呼籲示威者採取其他方式去表達訴求喎。
李家仁：廿年愛車要小心啲開
兒科醫生李家仁就話，佢嘅上班路線雖然只有一組交通燈受損，但佢駕駛時都係非常謹慎，尤其係佢有一部廿幾年車齡嘅座駕，生產廠只係承諾提供零件十五年，一旦意外受損，就要託朋友嘗試透過各種渠道尋找零件修復。為咗心愛嘅座駕可以長伴左右，最佳方法就係駕駛得小心翼翼喇。
卓妮