政情：民主阿婆過街老鼠又當街被鬧賣國賊
繼九月初被當街破罵漢奸後，被內地官媒狠斥為「叛國禍港四人幫」之一、被嘲為「民主阿婆」嘅前政務司司長陳方安生，尋日網上流傳一段短片，見佢喺灣仔某大廈大堂，被幾個市民追罵「漢奸、走狗、賣國賊」，更多番質問香港搞成咁，佢係咪好安樂？而佢只係一直低頭，唔敢正視在場嘅市民。
質問搞到香港咁 係咪好安樂
短片長只約十六秒，片中所見，民主阿婆正步入灣仔駱克道某大廈大堂，尾隨仲有一對外籍男女，該名女士正係與民主阿婆關係密切、前朝殖民地政府經濟司布簡瓊。當時有幾個市民即刻趨前，破罵民主阿婆係「漢奸、走狗、賣國賊」、搞亂香港、勾結外國人，又不斷質問搞到香港咁，佢係咪好安樂？期間，大廈保安員一度阻止在場嘅市民走近民主阿婆。
市民舉紙牌 斥勾結外敵賣國
面對市民嘅罵聲，民主阿婆一直低頭，冇作任何回應，而當佢、布簡瓊同外籍男子步入電梯，保安即阻止在場市民前行，其中一名市民即當面向民主阿婆舉起紙牌，紙牌寫上「漢奸走狗賣國求榮，民族敗類，賣國賊，勾結外敵、出賣港人」添！
其實，民主阿婆畀市民當街破罵已非首次，喺九月初亦有一段網上短片，地點同樣係灣仔，當時佢身處皇后大道東同太原街交界嘅行人路上等緊的士，有一名身穿藍白間條T恤嘅男子上前，用手持寫上「賣港求榮」嘅紙牌擋喺佢面前，不停咁向民主阿婆話：「你鍾意玩嘢，好鍾意玩嘢」，仲鬧佢「你睇吓，你出賣香港呀！不得好死。」民主阿婆即時面黑。
該男子又不停指住民主阿婆，鬧佢「賣港求榮、賣國賊；陳方安生、賣國賊，不得好死、八婆，的士都唔做你生意，話畀你聽（你）真係×街嚟o架，好人唔做，出賣香港。」
話時話，民主阿婆早就冇晒政治光環，但又不甘寂寞，經常走出嚟對政府指指點點，又經常到英、美等地唱衰香港，實在係唔知醜，依家當街畀市民罵，簡直就係過街老鼠，人人喊打喇！