有環保團體分析資料，發現香港轉運大量嘅廢塑料到部分東南亞國家，而近月就有三宗被廢塑輸出地退回貨櫃嘅個案，擔心退回廢膠料將會送去堆填區，批評香港嘅廢塑料出入口管制過於寬鬆。話時話，環境局局長黃錦星上任後，早幾年實施咗膠袋徵費嘅措施，呢兩年又話推動外賣餐具走塑，但原來香港淪為轉口塑膠垃圾嘅「自由港」，咁黃錦星推走塑有乜用？再唔快啲收緊廢塑料出入口管制，香港隨時變咗「廢膠港」。
