政情：林世雄話明渠可變親水休閒區

以前提起明渠，大家只會諗起好臭，發展局常任秘書長林世雄話時下嘅城巿策略，係以「藍」、「綠」為主，後者即係指綠化環境，前者就代表近水文化，會將過去視為「途人勿近」同「掩鼻而過」嘅明渠，改造為大家都可以靠近同接觸水體嘅休閒區域。

林世雄日前為沙田一個慈善跑擔任鳴槍嘉賓。儘管佢膝關節功能退化，難以從事長跑活動，但佢有留意到類似城門河畔嘅步道，好受到大眾，尤其係廣大跑友嘅歡迎，但其實流經巿區嘅明渠都有唔少，只要花啲心思整理一下，明渠都可以成為唔錯嘅康體場地。

喺明渠上方冚蓋呢種以增添路面為考量嘅處理方法，佢話已經係過去式，時下最潮嘅做法係將明渠嘅景觀美化，同注入生態保育元素，而南韓嘅清溪川，就係呢方面嘅成功案例。不過，要公眾都願意到明渠「親水」，明渠就唔可以污濁同有臭味，所以着手疏理上游，改善水質先至係整個近水文化工程嘅關鍵。