中環出更:單挑官員頂唔順 莫乃光自己剪布

尋日示威者堵塞各區主要道路,咁啱立法會資訊科技及廣播事務委員會下晝開會,唔知係咪因為啲議員塞車返唔到嚟,本身委員會有二十一名委員,但只得七個議員出席,最後全部議員走晒,得番主席莫乃光一個對住啲官係咁問問題,好似一個人拉布咁。

會議本身已經少人出席,梁美芬仲要無講嘢入一入嚟就走埋,之後剩番六個,在席嘅泛民議員得一個,喺發言完亦都離開會議室。去到第一個討論事項基本工程儲備撥款嘅尾聲,只係剩番馬逢國一個,當佢問埋問題之後,就剩低莫乃光對住三個創新及科技局嘅代表,佢惟有自己問問題打圓場,宣布議案通過。

得一個人開會 不斷發問

之但係,仲有另一個議程講電訊規管架構檢討,連商務及經濟發展局局長邱騰華都嚟埋。莫乃光叫秘書處打畀班議員返嚟開會,可惜都係無議員再入會議廳,得番莫自己孤零零好積極咁發問,好似一個人拉布咁。唔知係咪難得啲官上到嚟,廢事嘥咗發問嘅機會喇!可惜江郎才盡,最後莫乃光都無問題問,仲要自己剪布,宣布會議結束。

卓妮

第一手消息請下載on.cc東網iPhone/iPad/Android/Windows Phone Apps