中環出更：買獎券幫到人又可中獎 王賢訊：細個全家出動支持
想做善事，捐錢畀慈善機構之外，幫手籌款都係一個好方法，例如落手落腳去賣旗同賣獎券，既可以作為一個親子活動，教導小朋友行善助人，買獎券嘅朋友又有機會中大獎，雖然做善事唔應該望回報，但有時啲抽獎禮品又真係幾吸引o架！
仁濟醫院就早前舉行咗二○一九慈善雙週嘅獎券攪珠儀式，董事局主席王賢訊（Vincent）就話從小學一年級開始，每年學校都會派一大疊獎券畀佢哋賣， 每次獎券到手，都會用自己零用錢買幾張，當然係第一時間搵阿媽同姨媽姑姐大力支持吓啦，所以銷情從來唔係問題。Vincent仲話嗰陣啲獎品相當豐富，獎券上會印埋獎品嘅相，最深刻係見過頭獎係一個單位添！但佢就講笑話，嗰陣都有懷疑過啲獎品係咪真嘅，因為咁多年都未聽過有身邊人中獎喎。
周松東：小朋友賣旗易得多
副主席周松東話細個都有幫學校賣獎券，唔單止搵屋企人幫手，仲會企喺街頭搵街坊買，話以前易好多，十個有八個都肯買，仲講笑話可能街坊見到小朋友賣旗咁可愛會降低戒心啦！佢仲話係有實驗證明o架，事關佢同太太依家有陪埋小朋友一齊上街賣旗，每次嘅成績都係兩個小朋友賣晒，太太排第三，自己永遠都係包尾喎。
今次慈善雙週嘅大會主席、仁濟醫院另一副主席孫蔡吐媚就話，每年都會好支持買一大堆獎券，然後會派畀公司啲同事，但佢話都有同事講笑咁詐佢型，話未中過獎喎，孫太話係時候考慮吓搞個頒獎禮，等多啲人知道真係有獎品o架！
羅穎怡：抽中過機票鑽石鏈
咁究竟係咪真係有獎品o架？總理李永毅同羅穎怡有份出席今次攪珠儀式，羅穎怡就好肯定係有，仲話從小就一直有買獎券嘅習慣，而且仲中過幾次大獎喎，大學時期試過中東京來回機票，而最難忘係出嚟工作後，試過抽中鑽石頸鏈添呀！
卓妮