政情：環保署又搞嘢 少棄鬼「鬥」大嘥鬼
政府搞環保一向眼闊肚窄，未學行先學走，環保回收未做好，又搞垃圾徵費，極為擾民，就連卡通人物或「吉祥物」啲花臣都多過人。形象鮮明嘅「大嘥鬼」已經推出咗一段時間，環境局局長黃錦星近日又想搞多隻嘢出嚟。話說黃尋日落區玩突襲，到訪環保署嘅東九龍辦公室，聲稱發現咗隊外展隊，仲打算幫外展隊改名，講到明要一齊對付大嘥鬼喎，唔知想搞咩呢？
稱要更貼地 推動減廢
黃錦星話，見到班外展隊同事着住綠色Polo恤，職責唔止配合全港減廢回收，仲會落區幫街坊同社區組織，推動源頭減廢及乾淨回收，培養「揼少啲，慳多啲」嘅習慣。黃又話，呢隊新成立嘅「外展隊」要多啲「貼地」兼入屋，但係就諗緊改咩名好，現階段諗咗幾個名出嚟，包括「少棄鬼」、「外展師」、「循回隊」、「回收師」、「綠色衫」同「綠人組」，目標係要對付「大嘥鬼」喎。