政府早前實施「禁蒙面法」，引起社會極大爭議，立法會亦都就條例草案成立小組委員會審議。既然議案惹起咁大爭議，再加上公聽會名額亦一早爆滿，相信都有唔少議員提出修訂。前晚截止提交修訂，立法會秘書處收到有十一項廢除或修訂《禁止蒙面規例》所提出擬議決議案，亦都收到三萬份意見書。
由於條例係屬於先訂立後審議，根據法例，立法會可以喺收到文件之後的二十八日內提出修訂，依家小組委員會嘅審議期限喺本月十三日屆滿，小組委員會主席可以喺立法會申請延長審議期限，但由於依家立法會出現拉布，預計禁蒙面法都冇可能申請到延展日期，所以一班議員最遲就要喺前日提交修訂喇！
唔少民主派都趁機會提出修訂，其中民主黨許智峯仲直接提出要廢除規例添。至於其他民主派議員又點呢？人民力量陳志全就提出禁止警員蒙面，同埋要求加入豁免條款，話如果參與集會遊行嘅人，因為身份被人辨認而或面臨解僱、喺生活中受到煩擾恐嚇、被人得悉自己性傾向或性別認同、或損害同親人嘅關係都可獲豁免；公民黨楊岳橋就提出，將檢控期限由一年縮減至半年，其黨友陳淑莊就提出加入日落條款，要求條例喺下周三失效。