政情：建制出招 謀踢邵家臻陳淑莊出立會

陳淑莊同邵家臻同被判監八個月，但法官考慮到陳要切除腦腫瘤及接受康復治療，故獲緩刑兩年，而邵家臻亦於上月初刑滿出獄。據了解，建制派認為今屆會期只剩一年，又怕解除兩人議席後要重選，被外界批評浪費公帑，故傾向一動不如一靜，遲遲未作出任何行動。

其實，建制派議員何君堯早前已去信律政司，指陳淑莊因健康理由方獲法庭緩刑，但早前喺特首到立法會宣讀施政報告，受到陳淑莊等人嚴重干擾，又指陳嘅腦袋神速地康復，應該可以立刻返回監倉服刑，要求律政司向法庭提出覆核。勢估不到，建制派亦已計劃踢陳及邵出立法會。

程序繁複 或超出今屆會期

建制派議員蔣麗芸（阿Ann）尋日晏晝喺社交網站拍片爆料，話建制派已有議員向立法會提出，要求解除兩人嘅議席，仲話立會嘅程序又長又複雜，可能要成立委員會，亦都要喺會議入面辯論，成個程序都可能要超過一年，到時今屆立會會期完咗都未解決到，但選舉條例列明，假如任何人被判監超過三個月，未來五年都唔可以再參選立法會選舉，所以如無意外嘅話，邵家臻同陳淑莊下屆都唔可以參選立法會。

據悉，相關文件已經交咗畀秘書處，下個禮拜就會公布詳情，而工聯會同民建聯嘅議員分別提出有關邵家臻同陳淑莊解除立法會議席嘅要求，佢哋喺呢件事上面都好謹慎亦好保密，唔肯透露更多多詳情。

解除職務 需46位議員支持

按照《基本法》第七十九條（六）規定，議員涉刑事罪行被判監一個月或以上，經立法會出席會議嘅議員三分之二通過就可以解除職務，立法會主席可以即時宣告有關議員喪失議員資格。立法會依家有六十九位議員，撇除主席梁君彥預料按慣例唔表態，建制派及非建制派分別有四十二人及二十六人，若果二人入獄以月計，建制派有權按現行機制罷免兩人議席，如果六十九位議員都在席投票，解除議員職務門檻需要四十六位議員支持。如多名民主派表決嗰時不在席，或倒戈投支持票，都會影響罷免。