中環出更：手機在手唔使見人 李惟宏：顛覆傳統做生意模式
流動通訊科技不但令到好多人都離唔開智能手機，就連傳統商業經營模式，亦發生深刻變化。上海總會（總會）日前舉行講座，探討虛擬銀行同金融科技業嘅未來，常務理事李惟宏同好多年輕人一樣，智能手機已成為生活中不可或缺之物。
李惟宏話流動通訊帶來溝通上無比方便，想約家人一齊食飯，只要喺通訊群組留言，就可省卻逐個通知嘅麻煩。不過，溝通效率大為提升，相形之下面對面嘅交流變得無咁重要。佢認為大家都用智能手機並養成習慣，叫外賣、買機票同訂酒店等應用程式應運而生，以自助形式完成交易買賣，可謂顛覆舊有做生意嘅手法。
陳家強：金融業邁向虛擬化
擔任講座嘅嘉賓，財經事務及庫務局前局長、現任科技大學工商管理學院兼任教授陳家强就指時下嘅年輕人有一個傾向，就係唔多喜歡「見人」，若遇上問題，唔會打電話求答案，反而係透過智能手機尋求解決辦法，因此佢哋亦唔太滿意輪候時間長，又要填無數表格嘅傳統銀行服務。而切合個人需求，以創新科技來協助客戶掌握理財策劃嘅虛擬銀行，相信可以迎合時代嘅需要。
陳家強又話科技界不斷進軍金融領域，銀行、貨幣同資產都邁向虛擬化，理論上儘管可抹去政府嘅角色，從而對金融系統，同國際財經秩序都有翻天覆地嘅衝擊，但佢認為金融科技嘅實際影響未必有咁巨大，因為金融財經嘅存在，必須建基於信任，而信任就有賴政府嘅監管制度。
高鼎國幫襯過內地自助銀行
總會理事長李德麟、常務理事王立德同兩名理事阮婷婷及陳喆燁都有嚟聽講座，但李德麟就覺得黃金仍然係貨幣同資產價值之所繫。總會嘅青委會主任委員高鼎國，雖然冇幫襯過虛擬銀行，但早前喺上海就體驗過當地嘅自助銀行。佢話自助銀行，本來係屬於銀行職員嘅位置，由擴充功能嘅櫃員機取而代之，而客戶就置身喺一個恍如夾萬嘅安全環境下，自行操作所需嘅銀行服務，佢話金融科技嘅應用，內地較香港走得更前。
卓妮