政情：公民講場：議員遇襲借題發揮 廖長江拉布失敗

立法會連續幾個禮拜審議稅務修訂條例草案，但建制派議員不停拉布，目的係想拖延泛民主派議員成立獨立調查委員會查特首有冇違法或瀆職嘅議案，到咗尋日再度審議有關草案，突然發生何君堯遇襲事件，建制派班長廖長江罕有親自出手，提出動議休會待續議案，講吓區議會選舉暴力，但被主席以唔急切為由唔批准。老實講，建制派講嚟講去都係三幅被，眼見拉無可拉，而何君堯遇襲，建制派梗係想借機再拉布喇，但最終都係失敗收場。