政情：峯鴿搶手機調委會 泛民冇影建制罰坐
民主黨立法會議員許智峯（峯鴿）舊年四月喺立法會大樓內涉搶去政府女高級行政主任手機，結果惹上官非，終被法庭裁定普通襲擊等三項罪名成立，峯鴿被判二百四十小時社會服務令及罰款三千八百元。雖然官司告一段落，但峯鴿仍未甩身，事關立法會就譴責峯鴿議案成立嘅調查委員會工作未完成。之不過，調委會嘅泛民議員就懶懶閒，缺席尋日嘅會議，搞到調委會嘅建制派要乖乖哋坐定定，先夠法定人數開會。
話說調委會尋日早上九時半開會，包括主席麥美娟在內共有七名委員，根據立法會《議事規則》，調委會法定會議人數為五人，而尋日會議中，兩名泛民議員會計界嘅梁繼昌同法律界嘅郭榮鏗都缺席會議，結果其餘五名建制派議員都焗住要坐定定開會。
聆訊尾聲 料下月再開會
據了解，調委會早前已傳召過立法會保安人員作供，尋日係第二次聆訊，就輪到運輸及房屋局局長政治助理符傳富同立法會保安主管作供。聆訊已經去到尾聲喇，但峯鴿就一直都冇影。立法會秘書處稍後會整理證供，預料要到下個月先至會再開會喇。如果兩名泛民委員再唔開會，話佢哋唔係想放生峯鴿都冇人信喇！