政情：馬桶鑲嵌最多鑽石 沈運龍第10個健力士紀錄
要躋身世界之最極唔容易，但珠寶界有「中東王子」之稱嘅香港珠寶製造業廠商會榮譽會長沈運龍（Aaron）近日奪得第十個健力士世界紀錄，最新鮮熱辣嘅竟然係馬桶。有乜咁特別？特別在於係一個鑲嵌最多鑽石嘅馬桶。
逾4萬粒 重335卡
呢個鑽石馬桶依家喺上海中國國際進出口博覽會展覽，由十位鑽石工匠大師，以歷時三個月時間鑲嵌而成，用咗四萬零八百一十五粒共重近三百三十五卡鑽石，以懸浮技術鑲嵌而成。
Aaron喺一五年開始創下以價值二百萬美元（約一千五百五十萬港元）嘅鑽石結他，成功創造健力士世界紀錄，確認為當今世上價值最高嘅結他。雖然呢支鑽石結他製作耗時兩個月，但係佢想創世界紀錄嘅心願，就足足等咗二十年咁耐。其後，佢亦不斷奪得多個健力士紀錄，分別係鑲嵌最多鑽石嘅唇膏盒、手機保護殼同手袋，仲有鑲嵌最多寶石嘅結他，亦有鑽石太陽眼鏡等。唔知下次，佢又有乜新諗法，再創世界紀錄呢？