政情：周浩鼎拉布離晒題 被梁君彥中止發言
立法會連續第三個禮拜審議《二○一九年稅務（修訂）（稅務寬免）條例草案》，幾經辛苦尋日終於進入三讀辯論，但仍然無阻建制派議員拉布喎。周浩鼎尋日喺會議上一直講，仲愈講愈遠，從退稅安排講到中小企，再倒轉頭講番港英政府年代，立法會主席梁君彥都睇唔過眼，多次提醒周浩鼎離題但都唔聽，最後惟有中止佢發言啦！
講稅務寬免 回帶港英年代
議案進入三讀辯論本來係畀議員講點解支持或者反對議案，但係周浩鼎講咗句支持議案後，就開始帶大家「遊花園」。佢話稅務寬免上限得兩萬蚊好唔合理，希望政府用其他措施幫各行各業渡過難關。跟住話鋒一轉，佢話希望政府多啲幫中小企，建立協調機制，然後又突然講到歷史層面，話港英政府時期嘅積極不干預政策沿用至今，一切畀晒自由市場決定係有所不足。
梁君彥多次提醒佢離題，話「你再離題就停止你發言」，但係周浩鼎就係咁話「返緊嚟啦」，但事實上就係無視提醒繼續講，最後梁君彥都忍唔住，話佢講得太遠，唔畀佢再講嘞！