政情：託詞院校自主 無視暴行 楊潤雄遭建制炮轟

楊潤雄話近月部分大專院校同學校曾經發生衝突事件，強調唔接受任何言語同行為嘅暴力，希望學校能夠提供和諧同安全嘅教學環境，而教育工作者亦都要秉持專業操守，表達個人意見時亦必須要理性、和平同合法，唔能夠以言論自由同學術自由作掩飾，重申社會尤其對專上院校學生有高期望。佢又提及專上院校係獨立自主機構，負責處理包括示威、衝突等校園內發生嘅事務，亦有責任合理妥善處理學生事務，並保障校內教職員安全。

張國鈞：師生權益安全無保障

另外，佢又鬧有部分行為非常過分，如破壞校園設施、發表侮辱言論等，但院校要負責點樣教導學生、保障寧靜教育環境等，過去曾同大學校長討論，相信佢哋正盡力處理與學生間嘅關係以及解釋社會事件，重申自己信任院校及校長有能力處理，而大部分學生是理智，願意於學識上追尋進步喎。

之不過，楊潤雄嘅答覆令多名議員不滿，仲要發言嘅全部都係建制派。提出今次口頭質詢嘅議員張國鈞，批評過去校園所發生嘅並非楊潤雄所講嘅衝突，而係衝擊，因學生要求校方支持其校外行為，希望校方能夠一齊譴責警方，否則唔容許校長離開，又對持唔同政見嘅師生噤聲，認為校長已經自身難保，根本難以依靠院校自主去保障持不同政見嘅師生權益同人身安全。

陳振英：應關注校外犯罪活動

另一名議員謝偉銓亦話楊潤雄今次回應依賴院校自主，畀人感覺乜都唔做、乜都院校做，直言教育局責無旁貸，有角色去協助院校，有需要跟進院校不善之處，提出指導同糾正令校園作為教育地方，而金融界議員陳振英亦睇唔過眼，大話教育局應關注埋校外嘅犯罪活動，詢問教育局有冇實際行動，喺校園內呼籲學生勿參與違法集會囉！

楊潤雄今次連番遭到盟友建制派炮轟，唔知係咪嚇親，到回應張國鈞問題時竟錯稱對方做「周議員」，但聽聞佢反應迅速，好快已經私下向張國鈞耍冧喇！