中環出更：傳統武術再包裝切合速食文化
武術種類同門派多不勝數，卓妮早前喺一個活動上見識多個國術高手，更親身感受佢哋嘅真材實料，但呢啲傳統武術吸唔吸引到新血傳承呢？
香港國術總會（總會）早前舉辦大型國術表演活動，匯聚各門各派國術精英輪流獻技，好似有八極拳、龍形拳、尋橋等，總會創會會長王嘉恩、副會長周國豐、香港武術聯會會長霍震寰同總會秘書長歐陽鳳盈等都有到場欣賞。
太極融入生活 適合時尚女性
香港潮屬社團總會會董李嘉莉近年開始學太極，佢自言接觸太極係為養生，仲話感覺到多咗年輕女性學習太極，認為呢個現象與包裝有關，事關所學嘅新式太極，動作唔似傳統咁慢，加上會教導點樣將太極動作融入生活細節中，啱晒現今講求速食嘅社會同埋時尚女性喇！
孩子耐性欠奉 可先學跆拳道
練習詠春十多年嘅總會副會長周國豐就為兩個囝囝選擇學習唔同佢所學嘅武術，而係學習來自韓國嘅跆拳道。佢解釋，跆拳道較多動作，更能吸引到小朋友學習，相反傳統嘅武術講求基本功，需要練好基礎先會學踢腿等動作，由於小朋友耐性有限，所以會等佢哋大啲先畀佢哋接觸詠春。
學習過唔同武術嘅霍震寰就話，武術並非單純講點樣用力，背後其實包含住科學，例如力學、肌肉運用等，好似用手阻擋其他人時要將力卸走，唔知呢個講法可唔可以吸引到人學習武術呢？
近期社會衝突不斷，唔少人都怕咗出街，寧願留喺屋企。王嘉恩透露本身都諗過將今次一年一度嘅活動改期，但因多名武術師傅堅持而決定要如期舉行。佢坦言今年觀眾人數受到影響，但認為反而畀個理由佢明年要再搞多次個活動，好樂觀喎！
卓妮