受到內地非洲豬瘟嘅影響，活豬供應量一直短缺，市民同商販嗌晒救命，但食物及衞生局局長陳肇始尋日仲話預計今年下半年嘅豬肉供應量會進一步下降，即刻畀班議員狂轟喇，仲質疑當局會唔會為本地養殖業提供支援。老實講，業界好早已經提出活豬供港嘅問題，要求陳肇始諗方法處理，但供應量不增反降，即係豬肉價只會不斷升，咁仲得了，若果陳肇始繼續翹埋雙手唔做嘢，係咪想累到豬肉檔執晒笠，製造失業大軍？
